د.سەباح: جیاكردنەوەی كاری پزیشك كێشەی زۆر چارەسەر دەكات
" تەندروستی"
لە سیمینارێكدا بەناونیشانی " كەرتی تەندروستی لەنێوان ئاڵنگارییەكان و دەرفەتەكانی گەشەسەندن" كە لەلایەن دامەزراوەی ڤیژن بۆ لێكۆڵینەوەی ستراتیجی بەئامادەبوونی ژمارەیەك لە شارەزایان و پسپۆڕان و لایەنە پەیوەندیدارەكان ئەنجام درا، د.سەباح نەسرەدین بەڕێوەبەری گشتی تەندروستی سلێمانی لەووتەیەكدا باسی لە كەرتی تەندروستی كرد و چەندین داتای خستەڕوو.
د.سەباح نەسرەدین ڕایگەیاند: كەموكوڕییان هەیە لەسەرچاوەی مرۆیی و ژمارەی كارمەند هەربۆیە ناتوانن خزمەتگوزارییە تەندروستیەكان وەك پێویست پێشكەشی هاوڵاتیان بكەن و دواكەوتنی مووچە كاریگەری لەسەر كەمبوونەوەی خزمەتگوزارییەكان هەبووە و خزمەتگوزاریی فریاكەوتن و تەندروستی ئەركی حكومەتە بەشێوەیەكی ڕێكوپێك پێشكەشی بكات.
وتی: هەوڵی زۆریان داوە بۆ بەئەلیكترۆنی كردنی كەرتی تەندروستی و بەستنەوەی خزمەتگوزارییەكان بەشێوەی ئەلیكترۆنی، ئاماژەی بەوەكرد سلێمانی پێشەنگ دەبێت لە بەئەلیكترۆنیكردن و دیجیتاڵ كردنی كەرتی تەندروستی و بەم نزیكانە هەنگاوی گەورەی بۆ دەنرێت و دەكرێت سلێمانی بكرێتە شارێكی گەشتیاری پزیشكی.
بەڕێوبەری گشتی تەندروستی سلێمانی ئەو دەنگۆیانەی ڕەتكردەوە لەبارەی خراپی ڤاكسینی كوتانی منداڵ لەتۆڕە كۆمەڵایەتیەكان بڵاوبوەتەوە و وتیشی: نەكوتانی منداڵ بەهۆی دەنگۆكان كارەساتە و دەبێت زۆر وریایی بن و ئەگەر كوتان نەبێت ئەوا داهاتووی منداڵەكان زۆر مەترسیدار دەبێت.
بەڕێوەبەری گشتی تەندروستی سلێمانی باسی لەوەشكرد كێشەی زۆر گەورە بۆ خەڵكی چارەسەر دەبێت ئەگەر حكومەتی هەرێم بڕیار بدات بۆ جیاكردنەوەی ئەو پزیشكانەی لە نەخۆشخانە حكومیەكان كاردەكەن لەگەڵ ئەو پزیشكانەی لە كەرتی تایبەت كاردەكەن، چونكە تێكەڵاوییەك هەیە و گرفتی دروستكردوە.
ڕاگەیاندنی تەندروستی سلێمانی
ئه‌م بابه‌ته 244
جار خوێنراوه‌ته‌وه
AM:10:16:21/07/2025