گرنگی شیر پێدانی سروشتی بۆ منداڵ

" تەندروستی"


شیری سروشتی دایك، بۆ منداڵ یەكێكە لەرێگا چالاكەكان بۆ زامنكردنی تەندروستی منداڵ و گەشەكردنی، سەرجەم پزیشكان هانی دایكان دەدەن شیری خۆیان بەمنداڵەكانیان بدەن بۆئەوەی منداڵەكانیان تەندروستیان باش بێت و گەشەیان تەندروست بێت لەبەرئەوەی بە باشترین سەرچاوەی خۆراكى بۆ منداڵان دادەنرێت.

ئەگەر منداڵ لەیەكەم سەعاتی لەدایك بوونی تاوەكو تەمەنی شەش مانگی شیری دایكی پێ بدرێت و ئەو دۆخە بەردەوام بێت تاوەكو تەمەنی دووساڵی ، ئەوا دەتوانرێت ساڵانە 800 هەزار منداڵ لەسەرتاسەری جیهاندا لەمردن ڕزگار بكرێت.

لەگەڵ قۆناغەكانی درووست بوونی سكپڕیدا شیر دەست دەكات بە دروست بوون تاوەكو ئامادەبێت بۆ كۆرپە، بەكورتی شیری سروشتی دایك و گرنگییەكانی بۆ منداڵ لەچەند خاڵێكدا دەخەینەڕوو: 

1-
ژەك، لە قۆناغی كۆتایی دووگیانی و (2 بۆ 4)  رۆژی یەكەمی لەدایك بووندا دروست دەبێت و رەنگی زەردی لیمۆییە، بڕی پڕۆتین و كانزاكانی ناو ژەك بە چەندین جار زیاترە لە شیری ئاسایی و هەروەها شەكر و چەوریشی كەمترە، جگە لەوەش هەندێك فاكتەری بەرگری ناوازەی تێدایە بەڵام دوای چەند رۆژێك بەرە بەرە دەگۆڕێت و تایبەتمەندی شیری ئاسایی وەردەگرێت لە ماوەی 3 بۆ 4 هەفتەدا .
 
2-  ئاو، ئەو بڕە ئاوەی تێدایە كە منداڵ پێویستیەتی بۆیە تا تەمەنی شەش مانگی منداڵ پێویستی بە هیچ ئاوێك نیە بیدرێتێ‌ لەبەرئەوەی ئاو 80 % ی شیر پێك دێنێت . 
 
3- پڕۆتین و شەكر، شیری دایك  ( 1%  بۆ 1.5% ) پڕۆتین و ( 6.5%  بۆ 7% ) شەكری لاكتۆزە .
 
4 – چەوری، بڕی چەوری ( 3.5 % ) ە  ئەم بڕەش دەگۆڕێت بە پێی ئەو خۆراكەی كە دایك دەیخوات و لە هەر ژەمێكی شیردا بڕی چەوری لەبەشی كۆتایی ژەمەكەدا زۆرترە وەك لە سەرەتای ژەمەكەدا.

5– كانزاكان، بڕی كانزاكان لە شیری دایكدا ( 0.15 – 0.25 %)ە و هەموو كانزاكانی تێدایە . 

6- ڤیتامینەكان، بڕی ڤیتامین لە شیری دایكدا جیاوازە بە پێی ئەوەی كە دایك وەری دەگرێت لە رێی خۆراكەوەو هەموو جۆرە ڤیتامینەكانیشی تێدایە بە تایبەت ڤیتامینەكانی (C,D,B,K) .
 
7- توانای هەرسبوون،  شیری دایك هەرسكردنی ئاسانترە وەك لە شیری قوتوو،  شیری دایك چەوریەكەی ئاسانتر دەشكێت  و شی دەبێتەوە و هەرس دەبێت .

8- بەرگری، شیری دایك بەرگری منداڵ بەهێز دەكات و ئەم بەرگریەش بەردەوام دەبێت تا قۆناغی هەرزەكاری بە تایبەت دژی هەندێك نەخۆشی وەك ( نەخۆشییەكانی كۆئەندامی هەرس ، هەناسەدان ، هەوكردنی گوێ‌ ، شێرپەنجەی خوێن ... هتد ) كەچی شیری قوتوو هیچ جۆرە بەرگریەك بە منداڵ نادات .

9- هاوسەنگی لە پێكهاتە، شیری دایك لە پێكهاتەدا هاوسەنگە بۆیە لە داهاتوودا منداڵ تووشی قەڵەوی ناكات كە گرفتێكی گەورەیە بۆ منداڵ بە پێچەوانەوە شیری قوتوو ئەو هاوسەنگییەی تێدا نیە .

ڕاگەیاندنی تەندروستی سلێمانی


AM:09:10:20/06/2016

ئه‌م بابه‌ته 1840 جار خوێنراوه‌ته‌وه‌‌
زیاتر ...
Copyright 2015. dohsuli.com . All Rights Reserved.