ئەو ڤیتامینانەی بۆ ژنی دوو گیان پێویستە

تایبەت " تەندروستی "

ژنانی دوو گیان لەماوەی سكپڕی پێویستیان بەچاودێری و سیستمی خۆراكی تەندروست هەیە بۆ ئەوەی سەرجەم ڕەگەزە خۆراكیە بنەڕەتیەكانیان دەست بكەوێت بۆ زامنكردنی سەلامەتی و تەندروستی خۆیان و كۆرپەلەكەیان.

جگە لەسیستمی خۆراكی تەندروست و هاوسەنگ، پزیشكەكان دەلێن هەندێك ڤیتامین بۆ ژنی دوو گیان زۆر پێویستە ئەوانیش:

- فولیك ئەسید: رۆڵی گرنگی هەیە لەدروستبوونی ترشەڵۆكی ناوەكی و بەرهەمهێنانی خڕۆكەی سوری خوێن لەگەڵ گەشەكردنی كۆرپەلە لەماوەی سكپڕی.

- ئاسن: ژنانی دووگیان پێویستیان پێیەتی بەهۆی ئەوەی كانزایەكی گرنگە بۆ گواستنەوەی ئۆكسجین بۆ كۆرپەلە و گرنگی هەیە لەگەشەكردنی كۆرپەلە و وێڵاش و كەمی ئاسن لەماوەی سكپڕی دەبێتە هۆی دروستبوونی كۆمەڵێك كێشە.

- مەگنیسیۆم : ئەم كانزایە بەشدارە لەكارلێكە كیمیاییەكانی لەش و رۆڵی گرنگی هەیە لەپتەوكردنی بەرگری و ماسولكەكان.

- ڤیتامین دی: رۆڵی هەیە لەپتەوكردنی هەڵمژینی كالیسیۆم و رێگری دەكات لەوەی كاریگەری لەسەر ئێسكی دایك دروست بێت بەهۆی دووگیانبوون و گەشەكردنی كۆرپەلە و هەروەها سەلامەتی تەندروستی ددان و نینۆك و قژی ژنی دووگیان زامن دەكات.

- ڤیتامین بی 12: هاوسەنگی لەش زامن دەكات و تاڕادەیەك هەستكردن بە هیلاكی لەقۆناغی سەرەتا و كۆتایی سكپڕی كەمدەكاتەوە و دەبێتە هۆی باشتركردنی باری دەروونی ژنی دووگیان و سەلامەتی كاری مێشكی كۆرپەلە زامن دەكات.

- ئۆمیگا 3: ئەم ماددەیە گرنگە بۆ پێشكەوتنی مێشكی كۆرپەلە و مەترسی توشوبوونی ژنی دووگیان بەخەمۆكی كەمدەكاتەوە.

- ڤیتامین سی: لێپرسراوە لەبەرەنگاربوونەوەی كەم خوێنی كە تووشی ژنی دوو گیان دەبێت و یارمەتیدەرە لەهەڵمژینی ئاسن و زیادبوونی رێَژەی هیمۆگڵۆبین و خرۆكە سوورەكان و دەبێتە هۆی پتەوبوونی كۆئەندامی بەرگری و چالاكی جەستە.

ئا: كارزان عەبدوڵا
ڕاگەیاندنی تەندروستی سلێمانی

AM:11:30:23/12/2019

ئه‌م بابه‌ته 604 جار خوێنراوه‌ته‌وه‌‌
زیاتر ...
Copyright 2019. tendrwsti.com . All Rights Reserved.