بەشی پاككردنەوەی ئامێرەكان لەسەنتەری پیرەمێردی ددان كرایەوە
تایبەت " تەندروستی "
لەمەراسیمێكدا بەئامادەبوونی د.سەباح نەسرەدین ئەحمەد بەڕێوەبەری گشتی تەندروستی سلێمانی و ژمارەیەك لەلێپرسراوان و كارمەندانی تەندروستی، بەشی پاككردنەوەی ئامێرەكان لەناو سەنتەری پیرەمێردی ددان كرایەوە.
لە لێدوانێكدا بەڕێوەبەری گشتی تەندروستی سلێمانی ئاماژەی بەگرنگی ئەو بەشە كرد و رایگەیاند: تەندروستی دەم و ددان یەكێكە لەو پرسە گرنگانەی تەندروستی كەدەبێت هەمیشە جێگەی بایەخ پێدان بێت، بەداخەوە لەساڵانی ڕابردوو و لەئێستادا هەوكردن لەڕێگەی ئیشكردن لەددانەكان یەكێكە لەو گرفتانەی زۆربەی ناوەندە تەندروستیەكان لەجیهان پێوەی دەناڵێنن.
وتیشی: ئەو بەشە كاریگەرییەكی زۆری دەبێت لەكۆنتڕۆڵكردنی هەوكردنی جگەر و ئەو هەوكردنانەی لەڕێگای ددانەوە دەگوازرێتەوە.
د.راستی نەجات بەڕێوەبەری سەنتەری پیرەمێردی ددان ووتی: ئەم هەنگاوە تازەكردنەوەیە و پێشتر لەسەنتەرەكەیاندا هەبووە، بەڵام بەكۆمەلێك ئامێری دیكە كەوەك ئەوانەی ئێستا پێشكەوتوو نەبوون، ئەم ئامێرانە تازەتر و پێشكەوتووترە و دەتوانن خزمەتی گەورەتری پێ بكەن.
بەشی پاككردنەوەی ئامێرەكان لەناو سەنتەری پیرەمێردی ددان بەشێكی پاكژكەرەوەی پێشكەوتووە و باشترین ئامێری پێشكەوتووی تێدا بەكارهاتووە، هەموو نەخۆشێك سێتی تایبەتی خۆی هەیە و دڵنیایە لەوەی ئەوسێتەی بۆی بەكاردێت پاكژكراوە و بەكارنەهاتووە.
ئا: ئەنوەرحەمە غەریب - هەرێم بابەعەلی
ڕاگەیاندنی تەندروستی سلێمانی
ئهم بابهته 1052
جار خوێنراوهتهوه
PM:12:02:30/01/2019