تەمەنی نائومێدی پیاوان راستی یاخود خەیاڵ
" تەندروستی"
هەندێكجار گۆڕانكاریی هۆرمۆنەكان كە پەیوەندی بە بەساڵاچوونی پیاوانەوە هەیە بە تەمەنی نائومێدی ناودەبرێت كەئەوەش جیاوازە لەتەمەنی نائومێدی ژنان.
گۆڕانكاریی هۆرمۆنەكان بەشێكی سروشتییە لە بەساڵاچوون و زیادبوونی تەمەن و لەو كاتەدا گۆڕانكاریی لەهۆرمۆنەكانی پیاوانیشدا روودەدات.
تەمەنی نائومێدی پیاوان چیە؟
ئەم زاراوەیە بەكاردەهێنرێت بۆ وەسفكردنی كەمبوونەوەی رێژەی هۆرمۆنی تیستوستیرۆن یاخود گۆڕانكارییەكانی پەیوەست بە ساڵاچوون و پیربوون، تەمەنی نائومێدی ژنان و پیاوان تەواو جیاوازن، ئەو حاڵەتە لای ژنان بریتیە لەكۆتایی هاتنی دروستبوونی هێلكە و منداڵ خستنەوە و كەمبوونەوەی هۆرمۆنەكان بۆ ماوەیەكی كورت، لەكاتێكدا ئەو حاڵەتە لای پیاوان بریتیە لە كەمبوونەوەی هۆرمۆنی تیستوستیرۆن بۆ ماوەی چەند ساڵێك.
كاریگەریی كەمبوونەوەی هۆرمۆنی تیستوستیرۆن:
1. گۆڕانكاریی سێكسی: هەندێك پیاو رێژەی ئەو هۆرمۆنە لەجەستەیان كەمترە لەرێژەی ئاسایی بەبێ دەركەوتنی هیچ نیشانەیەك، كەمبوونەوەی هۆرمۆنی تیستوستیرۆن دەبێتە هۆی گۆڕانكاریی لەئەركی سێكسی و كەمبوونەوەی ئارەزووی سێكسكردن.
2. گۆڕانكاریی لەشێوازی خەوتن: كەمبوونەوەی رێژەی هۆرمۆنی تیستوستیرۆن دەبێتە هۆی تێكدانی شێوازی خەوتن و دروستبوونی كەمخەوی و خەواڵویی.
3. گۆڕانكاریی جەستە: گۆڕانكاریی ئەو هۆرمۆنە دەبێتە هۆی زیادبوونی چەوری لەش و دابەزینی ماسولكەكان و هێز و توانا و چڕی ئێسك و ئەگەری تووشبوون بە وەرەم و ئازای سنگ و هەڵوەڕینی قژ.
4. گۆڕانكاریی سۆزداری: گۆڕانكاریی هۆرمۆنی تیستوستیرۆن دەبێتە هۆی كەمبوونەوەی هاندان و متمانە بەخۆكردن و هەستكردن بە خەفەت و خەمۆكی یاخود دروستبوونی كێشە لەبیرەوەریی و سەرنجدان.
چارەسەری كەمبوونەوەی هۆرمۆنی تیستوستیرۆن:
* سەردانكردنی پزیشك و ئاگاداركردنەوەی لەو كێشانەی رووبەڕووی دەبیتەوە بەتایبەت كێشەكانی پەیوەست بە بواری سێكس.
* دیاریكردنی شێوازی گونجاوی ژیان و گرتنەبەری سیستمی خۆراكی تەندروست و ئەنجامدانی راهێنانی وەرزشی رۆژانە لەپێناو پاراستنی هێز و توانای ماسولكەكان و باشتركردنی باری دەروونی و بەدەستهێنانی خەوتنێكی باش.
* لەكاتی هەستكردن بە نائومێدی داوای یارمەتی بكە، خەمۆكی لای پیاوان دەبێتە هۆی ئەوەی هەستەكانیان نەخەنەڕوو و ئەوەش وادەكات زیاتر تووڕەبن و هەندێك لەپیاوان پەنادەبەنە بەر خواردنەوە كهولیەكان و ماددەی هۆشبەر.
ڕاگەیاندنی تەندروستی سلێمانی
ئه‌م بابه‌ته 2094
جار خوێنراوه‌ته‌وه
AM:10:13:27/07/2017